في موضوع سابق وضع الأخ علي الأهلاوي ردا يقول فيه “المصائب تأتي دفعة واحدة” … الظاهر الكلام هذا صحيح!

الإجازة الأسبوعية قبل الأخيرة كانت غريبة فعلا … ولسبب ما حبيت أكتب عن إللي حصل معاية.

تعالوا شوفوا ليش كانت غريبة

أولا .. يوم الخميس : هذا اليوم أنا مخصصه للجمعة مع الشباب لأني مأحب أروح أتمشى مع زوجتي في هذا اليوم لأنه الدنيا كلها زحمة واي مكان نروحه بتصير الطلعة بايخة جدا من الغلبة والبزورة إللي يصيحوا في كل مكان. فصارت الخرجات العائلية وسط الأسبوع والخميس مع الشباب والمدام عند أهلها ولا أقاربها . العادة في هذا اليوم نتجمع في بيت واحد من الشباب وأحلى تكوا وهرج وضحك لكن المرة الفائتة وجدت نفسي في السيارة مع أحد أصدقائي ومحتارين نروح نجلس عند معتز باشا لأنه مايبغا يطلع ولا نروح عند هاشم بيك إللي وعد ولد عمته إنو يجي “يتفرج” عليه وهوا يلعب كورة في في الملعب! ويبغانا نجي معاه …. كانت قمة الحيرة بصراحة وفجأة أنبرش حسين المنقذ بإتصال كاسح يقترح الذهاب إلى الكورنيش الجنوبي عشان نصيد بالمشكات… وطبعا وافقت علطووول وتوجهنا إلى الكورنيش الجنوبي وفوجئت إنو معتز باشا إللي مو راضي يطلع من البيت جاي مع حسين المنقذ … سبحان الله

أشترينا العدة عالطريق.. المشكات والأحذية ودورنا على مكان ننزل فيه. قبل لا ننزل البحر كنت متردد أشيل الجوال معاية ولا لأ .. المفروض ما أشيله طبعا ولكن تذكرت إنو زوجتي حامل وفي نهاية الثامن كمان قلت أفضل أشيله معاية في كيس وفعلا أخذت واحد من الأكياس حق الدانوب وحطيت فيه الجوال وبكت الدخان والولاعة وقارورة موية وانطلقت … نزلنا وكان البحر فاااااااضي ولا حصلنا شي بس أحلى شي في الطلعة إنو واحد من الشباب يقول إنه شاف “قمبري” ينطنط فوق الموية !!!!! ههههههههههههههههههههههه بالله مش قوية ياجماعة ؟؟ المهم عدينهاها. ولكن بعد دقائق أسمع واحد من الشباب يقولي في شي ينور في كيسك وأفتح الكيس وألاقيه مليان موية واللمبات تبع الجوال صارت تعمل زي الملاهي .. حاجة تنور وحاجة تطفي والهزاز أشتغل زي الدربكة… تخيلو بالله إيش الجوال دا ؟؟؟ للأسف HTC Touch Pro شاريه بـ 3700 ريال قبل شهرين والظاهر إنه أكل عين ماصلت عالنبي (اللهم صلي عليه وعلى آله). أكتشفت إنو الموية دخلت لأن الكيس كان مخروق من تحت!!

دق ناقوس الخطر وقتها لأنه العادة كل مايحصل معاية شي يقهر بالطريقة دي أبدأ أراجع نفسي لأني مقتنع إقتناع كلي ماتحصل بلوة إلا لخطأ أرتكبته أو مجموعة خطايا ما أنتبهت لها أو تناسيتها وجاء التكفير من عند الله والحمد لله على كل حال. صدقوني الواحد لو يسلم أمره بالطريقة دي الحياة تصير سهلة

طلعت بعدها من البحر وجبت المنفاخ حق الكفرات من السيارة وحاولت أجفف الجهاز ولكن بلا فائدة فحطيته على جنب وكملت الونسة مع الشباب ألين طلع الصبح كل واحد رجع بيته وهنا صادفت المشكلة الثانية بالبيت (الكمبيوتر بطل يشتغل)!!!

كل ما أشغله يعمل ريستارت لحاله قبل لا يبدأ الويندوز !!! بصراحة لم تواجهني مشكلة في كمبيوتري بهذه الطريقة من قبل لأني دايما أعملة صيانة بس الفترة الأخيرة أهملته شوية . بس بصراحة وقتها لاشعوريا طالعت فوق وقلت ياربي أنا إيش سويت ؟؟ وبعدها قلت قلت في نفسي أنا شكلي عامل جرية ورحت أنسدحت على السرير وغرقت في أفكاري ألين نمت.

صحيت من النوم وأشوف نور قوي داخل من الشباك فقمت زي المجنون إلى الحمام عشان أتروش وأروح أصلي الجمعة وهنا كانت المفاجأة لما طالعت في الساعة … كانت الساعة 3 … راحت الجمعة ! والله وقتها كنت راح أبكي من شدة القهر يعني بالله بعد إللي حصل معاية وكمان تروح عليا الجمعة؟؟ بصراحة اكتأبت إكتئاب شديد ماخف إلى بعد العشاء وكل الوقت مر وأنا سرحاااااان ولا عملت ولا شي حتى الكمبيوتر ماحاولت أصلحه.

بعد العشاء خرجت مع زوجتي ورحنا نشتري شوية أغراض تبع المواليد وبعدها توجهت للمحل تبع أخوية أحمد عشان آشتري من عندو أفلام ولما وصلت وقفت السيارة قدام المحل تماما وتركت زوجتي بالسيارة ودخلت أدور في الأفلام وفجأة أسمعها تصرخ !! أنا إلتفتت ولقيتها برا السيارة وتأشر على شي بالداخل وأخوية يقولي في نفس الوقت في واحد في سيارتك !!!!

تخيلوا بالله .. جريت على السيارة وأحصل واحد جالس محل السائق وبيحاول يشغل السيارة !!! طبعا هوا ورط لأنه لسيارة مالها مفتاح وتشتغل بالكرت … فتحت الباب وسحبته برا وأنهلت عليه لاشعوريا بأنواع الضرب والتلطيم ألين داخ عالأرض وفي نفس الوقت أخوية اتصل بالشرطة وقعدت جالس عليه عشان لايشرد ألين جات الشرطة ولما وصلو وشافو الرجال أتصلو علإسعاف وفعلا جا في 10 دقايق تقريبا وكشفو عليه بس الحمد لله كانت حالته ماتطلب انه يروح مستشفى وبعدها شالوه عالحجز وطبعا رحت معاهم عشان المحضر وكنت بصراحة أبغى أجيهم ثاني يوم بس العسكري قال ياعم ماراح تاخد نص ساعة ولما رحت قعدت من الساعة 12 إلى الساعة 2 ونص !!!!

في القسم حصل شي غريب … لما العسكري جاب الشخص هذا إللي دخل سيارتي وإللي بصراحة كان شكلو فلبيني وطلع باكستاني! أول مادخل الغرفة راح عند الصورة تبع الملك إللي في مكتب الملازم وضرب سلام !!! طبعا عندها بدأت نظرات الإستغراب مني ومن الملازم والعسكري ولما جلس الملازم يكلم الشخص هذا طلع الرجال لاااااسع !! لأول مرة في حياتي أشوف واحد عنده إنفصام بالشخصية قدامي … خمس دقايق الرجال يتكلم كلام عادي ومحترم وخمس دقايق شخص ثاني يقعد يخربط! وفعلا ثاني يوم حولوه لمستشفى يكشفو عليه وحسب التقرير تبعهم طلع الرجال من جد عنده إنفصام حاد وأمرت الشرطة الكفيل بترحيله في أقرب وقت.. أكتشفت لاحقا إنو الشخص هذا يعمل لدى شركة مكتبها في نفس المبنى إللي فيه المحل وكانو لسه جايبينه من كم يوم كمهندس كهرباء والملف تبعه مليان شهادات ألوان وأشكال!!

والله ياجماعة لما عرفت دا كلو ندمت لما أتذكرت الضرب إللي ضربته في الآدمي دا … ضربت شخص مرفوع عنه القلم .

وعلى فكرة .. وديت الجوال للصيانة وطلع مايتصلح … 3700 ريال راحت في البحر .

بس الحمد لله .. الأسبوع إللي إللي فات كان تمام جدا وحتى في العمل كان الوضع جدا ممتاز لدرجة حيرتني !!

الدنيا دي غريبة .. وياما حنشوف

الله يستر