فهد أونلاين

دايما الناس بتشتكي من بطئ الكمبيوتر بعد فترة من الإستخدام والحل الكلاسيكي داااائما هو برنامج تنظيف ولا البرامج اللي تسرع الجهاز وأحلى أنواع الكراكات

ياجماعة ترا مو كل جهاز بطيء يكون السبب من البرامج … في شغلة أحس كثييير ناسينها ولا مايدروا عنها … الجهاز لازم يتنظف من الداخل كل فترة ….
يعني شوفو الصورة دي مثلا

هذه صور للمروحة إللي يفترض انها تبرد المعالج (البروسيسور) … وهذا الشي عادة يسخن لما يشتغل الجهاز وكل مايكون في ضغط زيادة على الجهاز ترتفع حرارته أكثر وكل ما أرتفعت تخلي الجهاز يبطأ … القطعة المعدنية إللي تحت المروحة تمتص الحرارة الناتجة من المعالج نفسه والمروحة تبردها باستمرار حتى تخلي القطعة تقدر تمتص حرارة أكثر من المعالج وهكذا …في الصورتين اللي فوق زي ماتشوفو بعد فترة الغبار يسد المنافذ إللي يدخل منها الهوا إللي جاي من المروحة وبالتالي عملية التبريد تكون ضعيفة … فترتفع درجة حرارة المعالج ومعاها يصير الجهاز أبطأ …. في بعض الحالات بعد فترة المعالج يخرب نتيجة الإرتفاع الدائم في درجة الحرارة وبعض الأجهزة يجي فيها نظام حماية مدمج في اللوحة الرئيسية مايسمح للجهاز بالعمل اذا أتعدت درجة الحرارة 50 درجة مؤوية …. وهذا ممكن يكون أحد أسباب مشكلة الأجهزة إللي تعمل إعادة تشغيل ولا تنطفي لحالها كل كم دقيقة ….
الجهاز إللي في الصورة جابه واحد من الشباب ليا وكان معدوم العافية من الداخل وطبعا فيه أخص من كده بكثييير بس هذا إللي قدرت أصوره والحل إنكم تجيبوا أي شي ينفخ الهوا بقوة زي الاستشوار مثلا وتنظفوا بيه المروحة … وإذا ماعندكم شي ينفخ الهوا بقوة فطيب عليكم تشيلو الجهاز عند أقرب بنشري وتنفضوووه نفض

شوفوا شكل المبرد كيف بعد التنظيف

وربي شكله يفتح النفس حتى …. يا سلاااااااااااام … شي مريح فعلا
طريقة التنظيف موضحة أكثر كما في الصورة أدناه

توجهوا المنفاخ على مرواح التبريد والهوا القوي راح يقشع الغبار اللاصق من محله وهذا اللي أستخدمه في الصورة منفاخ هوا تحصلوه في مراكز ساكو ولا في أي مركز ولا محل للعدد الكهربائية … وبالمرة لا تنسو تنظفو الأماكن الباقية من الغبار …. يعني حاولو الجهاز يكون خالي من الغبار من الداخل

والصورتين أدناه توضح عملية تنظيف محول الكهربا تبع الجهاز لأنه عادة يجي بداخله مروحة للتبريد ويصير معاه نفس اللي يصير مع المعالج وترتفع حرارته وممكن يخرب خاصة لو كان مش أصلي وهوا إللي منتشر طبعا

أتمنى تكونوا أستفدتوا من الموضوع دا
وصل اللهم على سيدنا محمد وعلى آله